Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
50 Stai fir falsch parggiere zaalsch in Baasel-Stadt
notiert dr Schugger dy Nummere lätz, git s 30 % Rabatt
die Buesse koschte, d Schugger wän au e Sagggäld ha
drum halt ych ney am Zebrastraife au fir d Schwoobe aa
hesch drey Bromill, denn muesch bloose, stoppt e Schugger dy
und wenn s e Schuggermyysli isch, he joo, denn bloost…
e Zwanzger brennsch, duesch hemmigsloos ummenanderschmuuse
und schloosch am Matsch e Ziircher ab, bikunsch e Labbe uuse
Am beschte lääbe in dr Schwyyz kasch luut Tescht in Riehe
Verstoosch du das, will ääne draa het s numme dummi Sieche
Au sunscht hänn d Schwoobe e Egge ab, ain wott uns bekeere
Schafft die Baseler Fassnacht ab, dr Lärm wurd yyn so steere
Wir sind Papst, sott hochdytsch syy – die sinn total duure
Schlimmer isch, dass unseri Goofe im Kindsgi so mien schnuure
In dr Zyttig gseesch dr Schröder und d Merggel noo dr Waal
E grossi Foti mit Yyberschrift „Gammelflaischskandal“
H20 stoot fir Wasser – GC stoot fir nyt
H5N1 fir d Voogelgrippe, die stresst e Huffe Lyt
Mit däm Begriff wird au d Regierig z Baasel guet ergläärt
Miir hänn 5, und laider isch nit 1 ebbis wäärt
Fir d Saskia git s kai grien Liecht – s Volgg wott syy nit haa
Vermuetlig lyygt s am roote Liecht vo yyrem liebe Maa
Im zwaite Waalgang wott sy nimm, dr Grund duet syy ys schryybe
Bärn het gsait, die Grippe kunnt, y muess dehaime blyybe
In dr Sändig hyt kocht dr –minu mit em Sabo Franz
Scheen, dass koo bisch, y ha Fraid und zaig dir zerscht my Häärd
Sy kecherle warm, druff maint dr –minu bim gmietlig zämmehogge
Jeemer, nimm no e Schliggli Wyy, sunscht wirsch am Aend no drogge
Dr Blocher bloogt d Asylante, mit dääne isch s passé
Bim bläggändblond kasch s Hinterdail vom Herr von Roor gsee
D Hingis git wyyder Interwiu – kaine ka s verstoo
Kai Wunder sait dä Bäär zue sich, es längt, jetzt will y go
Stand emol uff, jetzt hebsch d Aerm – he, das isch dr Hit
Grais mit de Lände – schnuufsch dief y und jetzt e Ussfallschritt
Du hesch Talänt, s hän s alli gsee, fangsch die Balle do?
Megastargg, du rettisch uns – und Zubi, du kasch goo
Dr Bundesroot faart Drottinett, s Micheline macht e Booge
Sy sott nach rächts und styyrt nach linggs – ou, denn isch sy gflooge
Dr Laiebärger luegt sy aa und sait denn ganz schoggiert
Das gaat doch nööd, jetzt häsch du zvill Fiinstaub produziert!
Im Dino-Pargg hänn Wandaale e Saurier demoliert
Bai ussgrisse, dr Kopf verschlaage und dr Schwanz kaschtriert
S Ganze goot dr Rhy durab, dä Verlust beduurt tout Bâle
Bi de Schwoobe daucht er wyyder uff und gwinnt deert d Kanzlerwaal
Mr faare mit dr SBB, nur rauche darfsch halt nimm
E Basler Baizer ooni Hirni findet s nit so schlimm
Rauche schaadet – d Gfoor isch ryysig – e Byyspil hämmer doo
Dr Vatigghan het schwarz-wyss graucht – und e Schwoob isch uusekoo
S PISA zaigt am Sunntig oobe, wäär guet dängge kaa
Wie immer mälde sich als Letschti die vom Bäärnbiet aa
Au 20 intelligänti Ziircher kasch am Bildschirm gsee
Und glaube sy uns – mir hänn gsuecht -, es git nit aine mee
So, das wär s fir hitte gsi vo unserem Schnitzelbangg
hoffedlig hän yyr Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam