Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
Wie am Gotthard sott s au an dr Fasnacht diväärsi Phaase gää
fir d Glygge bidyttet Phaase blau, mr geen jetzt ain go nää
gääl haisst d Glygge ka go schiffe – fir Dy haisst s uriniere
und grien bidyttet fir alli Baizer, d Bryyse jetzt halbiere
und schwarz isch s Zaiche, e Bus voll Ziircher stoot bim Spaaledoor
bi rosa suecht am Spaalebärg dr –minu e gails, neis … Kaffileffeli
jetzt frooge sy sich, was bidyttet wool die rooti Kaarte
Gugge sofort d Stadt verloo, am Belche oobe waarte!
D Lyychehalle vom Doggder Haagen isch scho graagled voll
mit Fuudiblutte – drum dänggt äär, e Assistänt wäär toll
hän syy Inträsse an däm Tschobb, denn mälde sy sich schnäll
dr –minu bewirbt sich – aber nur fir die männlige Modäll
E Bundesrichter spuggt uff aine vo dr Ziiri Zytig
das isch normaal, das miech äär – schyynt’s – vom Määntig bis am Frytig
am Wuchenänd erhoolt är sich – äär duet s bsunders gniesse
im Joggeli stoot er – im Blogg D – und duet deert Fyyrzyyg schiesse
Dr Busch fliegt yber d Schwyyz und het e Waffedeppo gsee
äär delifoniert sofort uff Bärn dr Micheline Calmy-Rey
das Deppo muess ewägg, sunscht griff y aa – drey Wuche hän sy Zyt
excusez-moi, cher Président, das isch dr Monolith
Dr Tschäggsen het zwai Bilder kauft und wott si – schyynt’s – nit zaale
äär paggt si uss, äär luegt si aa und lyydet Hellegwaale
äär schittlet dr Kopf, sii gfalle yym nit, die mien sofort verschwinde
kai Wunder, die Bilder zaige yyn vo vorne und vo hinde
E Pfaarer sait ze sym Pfaarerschatz: „jetzt derfe mr s au dryybe“
ab sofort dääglig haisse Sex, aber s muess bladoonisch blyybe
y haa d Leesig – halleluja – deert mien miir ys nit schämme
kumme mr mache d Regruteschuel und teschte s Sperma zämme
Inträssi hätte ainigi ghaa, au dr Oogi hett yyn welle
verschrotte isch besser, als yyn z Kanderstääg als Chalet aane z stelle
dr Fliege-Ebner offeriert – deert lagere ich my Schatz
inzwische het sy Vermeege inere Zindholzschachtle Blatz
dr Bligg mecht yyn als Laagerhalle fir die woore Luugigschichte
dä isch scho imene Mooned voll bi däm Saich, wo die dääglig brichte
jetzt isch er Schrott – das miesst nit syy – mr kenne s nit verstoo
d Frau Dreyfuess hätt en als Schrangg fir yyri alte Glaider gno
Dr Schmiir-Inschtruggdr ergläärt die Schyybe – e Schugger frogt en schlau
Sii, wo isch dr Unterschiid zwysche Zoone wyss und blau?
dr Bescht im Tescht bikunnt e Pin – är drait yyn stolz uff dr Rutte
är haigi – schyynt’s – als ainzige gwisst, e Schtund het 60 Minute
Z Bärn sueche sy e Usseminischter, dr Moritz will go raise
y kontrollier bim Lande z Ziiri grad no d Aaflugschnaise
ärnsthaft, wär wird Usseminischter? Sämi, y dängg an dy
bis hytt isch vo dr SVP no kain im Ussland gsi
dr Finanzminister sait zem Sämi, du sottsch das Aemtli griege
als halbe Bundesroot zaalsch du dr halbi Bryys bim Fliege
vergässed das, das isch my Tschobb, duet d Metzler broodäschtiere
so kan y sälber vo Affrigha d Asylante importiere
was Affrigha? Sait dr Käspi, fir myy wäär s biggobello
ych mach dä Tschobb und bring de Kineese syybedausig Wello
me stimmt denn ab, s Micheline wird s, dr Guschbäng sait nit froo
du striggsch mr zerscht dr Pulli fertig, denn kasch ins Ussland goo!
Flammewäärfer, Panzerfaarzyg und iberaall Stacheldroot
Dräänegaas und Persoonekontrolle, dass au kaine duuregoot
am Himmel styyge Kampftschet uff im Taggd vo zää Minute
das isch nit s WEF – eso goot s zue, wenn Zircher z Baasel schutte
So, das wär s fir hitte gsi vo unserem Schnitzelbangg
hoffedlig hän yyr Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam