Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
Die europäisch Bildigsstudie sait yber d Schwyzer uss
wenn zää e Täggscht mien lääse, kunnt nit jeede druss
8 versteen iin – zwai halt nit – si, das isch doch gsteert!
ai Troscht git s: bi de Schwoobe isch s Verhältnis umgekeert
worum isch unser gaischtig Niiwo bletzlig soo dief unde?
mir baide hän drum recherchiert und äntlig uusegfunde
d Statistigg sait – es isch fataal – das kippt ys uss de Schue
z Baasel nimmt d Bevelggerig ab, und z Ziri nimmt si zue!
Aine vo fimf Schwyzer het Mie, e Täggscht z verstoo
lach nit, du kenntsch grad so guet au do vorne stoo
was wird uss dir – ai Chance git s – mr glaube ganz fescht draa
hesch kai Mie, dä z’ässe, wirsch Presidänt vo Amerika
D Regrutte sin verwaichlicht – sy, s wird immer schlimmer
aine frogt bim yynekoo, hän sy kai Ainzelzimmer?
Herr Oberscht, rieft e andere, bringe sy mi Waage
sy wisse doch, ych daarf nit meer als syybe Kilo draage
yyberfrindlig duet dr Fäldi bi jedem ainzeln tschegge
sott me syy am niini oder halber zääni wegge?
ain interessiert d Yyberlääbenswuche – forderet die ys stargg?
die wird brutaal, sait dr Kadi, mr geen in Europapargg
Syt 7 Wuche herrscht Hochbetryyb an de Schalter vo de Bangge
me dyyschlet s Gäld in Euro um, nur d Schwyz, die blyybt bim Frangge
fir 2 DM git s 1 € – das interessiert doch kaine
besser wär, me miechti doch uss 2 Schwoobe aine
Zue 26/26 hän mir e Umfroog gmacht
dr Grischdian Gross maint, alles isch meeglig, nur kai 1:8
d Hingis styygt grad ussem Fluugi, fir ai Mool ooni guy
ich find, am beschte wär mir mi e glatts 6:2 6:2
dr Schawinski hän mir gar nit gfrogt – was dä sait, wisse si
myni Idee sich scho immer 24/24 gsi
dr Ueli Muurer hänggt s Delifon uff, das Gschtiirm goot yyn nit aa
uns wunderet s nit, denn d SVP het no nie e Linie gha
Wär hät no gärn e aigeni Linie? Dr Schumi streggt sy Hand
er fliegti gärn vo Monza haim ins Appezällerland
d BVB wott e aigeni Linie – am liebschte scho morn am Moorge
drmit kenni sy die roschtige Drämmli in dr ganze Wält entsoorge
nai nai, Herr Blocher, fir syy git s nit – das kenne sy vergässe
yyri wytischt Rais isch ins Albisgietli zem Zirigschnätzlets ässe
y verzichte, sait dr Ogi, no gschlaage vo dr Waal
fir die vom IOC bruuch ych kai Höbb im Kanderdaal
Mir frooge dr Jäggi, was dien sy im Joggeli bsunders gniesse?
y stand mit em Bier in d Muttänzer Kurve und due Betaarde schiesse
uns gfallt am beschte dr neyi Baanhof – sy, dä isch famoos
dangg däm sin mir nonem Matsch d Ziircher schnäller loos
Z Baasel git s e Gay Card – die Schwule kenne spaare
und wott ain ginschtig Räschte ässe, kan er zem –minu faare
aine frogt dr Fäärimaa „isch die Karte giltig doo?“
hösch, Digge, wenn nit zaalsch, wirsch nie ans andere Ufer koo
Dr Guschbä frogt dr Leyebärger bim Bundes-Pause-Tee
was isch glyych bi dr Expo und dr SVP?
Pascal, fröög nit so en Saich, het dr Moritz bällt
baidi choschted – die ainti Nerve und die ander Gäld
Moritz, das isch nit ganz richtig – oh, quelle grande blamage
du waisch doch, baidi sin fir d Schwyz uff e Art e Plage
ych waiss defüür de Unterschiid – he ja, ich bi nid blööd
d Expo isch fertig ändi Jaar, die ander laider nööd!
Bi dr Ereffnig vom St. Jakob-Pargg blyybe 2 Blätz frey
d Securitas understitzt bim Sueche unseri Bolizey
e Schugger luegt in d Duube yyne und het sich d Auge gryybe
gueten Oobe, Frau Martinetti, sin sy stegge blyybe?
So, das wär s fir hitte gsi vo unserem Schnitzelbangg
hoffedlig hän yyr Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam