Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
Dr Charles het Hochzyt, d Gwiin isch froo – und fyr die Zeremonie
ladet sie dr Pabscht vo Rom ganz perseenlig ii
Zerscht brummlet dä si Urbi et Orbi, doch pletzlig steent er lutt,
Herr im Himmel, saag mr bitte, welles isch jetzt d Bruut!
Hesch glääse, wäg dr Zollfreistrooss, dien d Gägner demonstriere
mit Hungerstraigg im Griene lyyge – und nit emool grilliere
Chapeau, wie die kämpfe fir d Nooerhooligszoone
was Erhoolig, wenn nääbedraa esoo vyyl Schwoobe woone
So grossi Stai vor em Laade mache d Bijoutterischte froo
Raiber kenne z Ziri nimm mit em Auti dur d Schiibe koo
die Stai mien wägg, sait d Bolizey, mr dien die Drottuar mischte
fir ain hänn miir e Subberblatz bim Zuubi vor dr Kischte
Tutanchamun – e Ryysenerfolg, dr Bloome het das gschmisse
do das „Wetten, dass…“ mit WC-Rolle isch doch kreativ
alli vo Baasel mit Rang und Namme wiggle sy deert yy
so gseet sogar die Zanolari e bitz simbaatisch dry
Dr Hakan het kai Gligg z Paris, är blybt nur kurzi Zyt
uff Istanbul will d Mamme nit, mit em Dreyraad isch das z wyt
Sy, das het sich gänderet – die hän dä Luusbueb gno
aber ych bi sicher, am näggschte Mäntig muess dä wiider go
10 Mool wird dr Hakan in däm Joor transferiert
uff 9 Soldaate wird d Armee im Frielig reduziert
8 Gool git s im Joggeli fir GC in ninzig Minute
und 7 Fääns luege d Mätsch, wenn die dehaime schutte
nur 6 Mool het im letschte Joor dr Rotschi verliere miesse
5 Dääg bis e Brief aakunnt, wotsch ain mit A-Poscht griesse
in 4 Minute bisch wiider duss, wottsch nit im Wooghoof blyybe
und nur 3 Schugger kenne iire Namme richtig schryybe
s 2 hesch am Rugge, duesch di Stutz bim Beering investiere
und 1 Combino-Drämmli git s, wo nit muesch repariere
und 0.5 isch d Promillegränze vom erschte Jänner aa
nai, das isch dr IQ vom Bresidänt z Ameriggha
Informativ – dääglig frisch – und au s Format macht Sinn
dangg grosse Bilder und weenig Täggscht het s kaini Fääler drin
s Kulturmagazin zaigt das alles – fir my Ussgang näggschte Frittig
und s Beschte draa – s isch scheen verpaggt – mit ere alte Zyttig
Fir d Basler Schugger git s neyi Glaider, au dr Bebbisagg wird blau
s isch schwiirig, die baide z unterschaide – die Farbwaal isch nit schlau
trotz allem git s ai Unterschiid – dä liggt doch uff dr Hand
dr ainti Sagg stoot nur am Mäntig morge ummenand
50 Joor Roggnroll spiilt yys s Radio vor
s Fäärnsee zaigt im Saalewaidli s Lääbe vor 100 Joor
wottsch laiff s brimitive Dängge uss dr Staizyt gsee
so gang doch an d Barteyversammlig vo dr SVP
Z Baasel baut me! Aber wie! Dr Wooghoof isch e Gschicht
au d Drämmli hän e Schaade und dr Baanhoof isch nit dicht
die drey Blaaner hän sich zämme doo fir e ney Brojäggt
si baue z Ziri s Stadion – sy, das isch perfäggt
Ziri bruucht yys, mached mit, liebi Männer, liebi Fraue
sy sinn spoot draa mit em Stadion – mr hälfe dääne baue
Parking, Shopping, Fitnesscenter und e Haim fir alti Lyt
s git ai Bedingig – deert wird nit gschuttet – vo däm versteen die nyt!
So, das wär s fir hitte gsi vo unserem Schnitzelbangg
hoffedlig hän yyr Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam