Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
E Ryysehärde Schwooberinder raast durch unseri Stadt
au d Metzger renne um yr Lääbe, sy drample alles platt
nai nai, das isch nit BSE in dr letschte Phaase
ai Mool wänn die im Joggeli uff dr ghaizte Matte graase
Sii, was isch mit de Schwoobe loos? Kenne sii s verstoo?
no immer waiss dr Helmut nit, wohär das Gäld isch koo
dr Begger, wo im Färnsee sait, Nutella, das empfääl er
vergisst no fascht sy Vatterschaft noch sym Hoppelfääler
als Prinz vo Hannover goot är an d Expo, me muess yn nit lang bitte
10 Apéro sind fir d Bloose zviil, er schifft an d Tirgge-Hitte
dr Grischdoff Daum als Motivator het syni Spiiler gschliffe
und sait fir e Maischtertitel git s e Grattisrundi Kiffe
dr Kaiser Franz mit Begge-Power, wo am Stammdisch braalt
an wieviil Egge vo dr Wält är Alimänte zaalt
d Lischte wäär no viil viil lenger, doch syg ganz aifach gsait
do seet me, wie schnäll sich BSE uff d Schwoobe yberdrait
Mr spiile hyt mit Brominänte wär wird Millionär?
als erschte Gascht dr Ueli Muurer – d Frooge sind nit schwäär
wär isch Bresidänt vo dr SVP? Herr Muurer, sy sind draa
y glaub, y setz e Joker yy und lyt em Grischdoff aa
Fir die näggschdi Staffle vo Big Brother im Primatehuus z Glattfälde
hän mir Kandidate gsuecht – e Huffe dien sich mälde
beworbe het sich dr Prinz vo Hannover, aber sy dä wämmer nit
will yym sig s glyych, ob s im Container e Männer-WC git
au d Abfaarts-Nati het sich gmäldet – me waiss, dass daas nit goot
das gäbt nur Lämpe, will die kämte sogar zem Aesse z spoot
sy bessere sich und fände s Huus zem Trainiere gail
die Hyygel, wo s het im Innehoof, wääre nit so stail
dr Uriella hämmer e Absaag gä, druurig het sy gflennt
will s im Huus kai Wanne het, wo sy s Wasser weihe kennt
sy verzichti druff, das isch yys glyych, die het ys nit verstande
will s greescht Broblem isch dr Innehoof, deert ka kai UFO lande
zuedäm isch dr Innehoof fir d Nella reserviert
in d Zimmer basst die nit, mr hänn s dausig mool brobiert
d Schallere schryybt – o leent mi yyne, y wuurd drfir no zaale
und ybernämti gäärn als Aemtli im Huus d Wäscherei-Zentrale
E Schurrnalist im Joggeli sait zue sich jetzt phagg ys
und froogt, was sind yri Saisonzyyl, Herr Koumantarakis
mit pflägte Kurzbäss, Cecca-Flangge d Gägner yyberflüügle
und hilft das nyt, haisst FCB faule, cätsche, brüügle
Am Wirtschaftsgipfel in Davos kasch nimmi sicher sy
drum laade miir im näggschde Joor die Lyt uff Baasel yy
dr Tuurismuss-Illy kunnt ins Schwitze, dr Grund dä dien sy kenne
äär waiss uss Erfaarig vo Luzärn – Brugge kenne brenne
zem Schutz vor Demonstrante dien mir yys vorberaite
e Ghaimdienst schafft im Untergrund, dr Schindhelm wird yyn laite
e Schugger het s an jedem Egge, und unsere greeschte Stolz
isch d Rageeteabschussbasis uff em Bruederholz
und falls die griene Segge dr Rhy uffschwimme sotte
startet in Glaihynige em Schild sy U-Bootflotte
die sind denn gfrustet, miir hänn e Gschängg und wänn ys revanchiere
e Grattisbillie fir uff Ziiri zem deert go randaliere
D Frau Clinton git sich im Senat wie immer elegant
hyt het sy e Bewärbigsgspröch, sy suecht e Braggtikant
änglisch kan är, franzeesisch au und sportlig isch er zwäg
nice to meet you, Hillary, I’m Dölf from Kanderstäg
Neyi Karte git s zem Jasse, sii, die sind doch nyt
drum unsre Vorschlag, mached Karte mit bekannte Lyt
fir d Härzdaame d Claudia Schiffer, wo Männerhärze bricht
als Trumpfkeenig dr Kaiser Franz, wo waiss, wie me Daame sticht
gaignet wär dr Sämi Schmid in Form vom blutte Näll
und als Buur dr Grischdoff Blocher, dä sticht dr Sämi schnäll
zwysche Ass und Brättli kunnt e faisse Zääner fyyre
druff dr Helge vom Helmut Kool, will Zääner kasch guet schmyyre
als Schiltekeenig dr Pinggelbrinz – hänn sy s scho begriffe?
hinter das Schild kennt er bequäm unerkannt go schiffe
als Schällekeenig dr Brinz vo Aengland, doch stellt me fescht, oh je
wääge däm syne grosse Oore kasch d Schälle nimmi gsee!
So, das wär s fir hitte gsi vo unserem Schnitzelbangg
hoffendlig hän yyr Fraid dra gha, mr saage härzlig Dangg
wyyterhin e scheene Oobe und e tolls Brogramm
mached s guet bis zem näggschde Joor – Eyri zwai Tam Tam