Dr Phaapst verzellt am Sunntig Moorge – wär s au immer glaubt
ass d Kirche s Benutze vo Kondom in gwisse Fäll erlaubt
Mamma mia – porca miseria – fluecht aini ganz entsetzt
s isch d Mamme Berlusconi „worum saisch das eerscht jetzt?“
D Aida spiilt bi uns in Baasel am Uufer und im Bach
Goschdym, Laarve, luuti Muusig – bis uff Hyynige gheersch dä Grach
s Marie het deert ganz versteert dr Maa zem Näscht üüsgschasst
Schämpe, loos, mr hänn – verdeggel – dr Moorgestraich verbasst
Es brennt bim Bell, d Fyyrweer kunnt, dr Kommandant seet root
will ai Gaffer drotz dr Waarnig viil z nooch aane stoot
geen si nit so nooch ans Fyyr – sunscht dien sy sich no wee
do maint dr -minu „y ha no nie so viil haissi Wirschtli gsee
Im Albisgietli daagt d SVP, brichtet s 10 vor 10
und aim vo dääne haig me deert bees uff e Ranze gää
mir baide sin ys nit ganz ainig bim Bier am Baizedisch
ob das jetzt e gueti oder e tolli Noochricht isch
Het s in dr Schwyz z viil Ussländer – e Umfroog hilft ys do
20 Prozänt sin yyberzigt – jo, das isch eso
20 Prozänz saage nai – e Ussgliich, wie si seen
bi 60 Prozänt isch d Antwort gsi – ych laider nix versteen
In A380, wo z Gloote landet, basse dausig Lyt
ooni z lande fliegt dä fuffzädausig Maile wyt
mr nutze das Fluugi intelligänt – eso, ass es sich loont
nur dausig Fliig und scho isch sicher, ass in Ziri kain me woont
D Kate und dr Willie zien zue miir in Bögginghämmbalascht
dr Charles isch niidisch, will är nit darf – lägg, s verjaggt iin fascht
y kaa s erglääre, liebe Soon, dä ka das kuum fasse
du waisch genau, ass dini Oore nie deert yyne basse
D Graagghe Paul wird an dr WM im Färnsee yberdrait
Dytschland froogt und jedes Mool het die d Wooret gsait
Grind ins Wasser – e weeneli waarte – das het mit faszniert
am Tinguelybrunne dauch y e Schwoob – und si, s het funggzioniert
Wäär goot fir d Schwyz an d Eurovision? S isch aigedlig fir d Katz
e Solo uff ere Vuvuzela macht dr erschti Blatz
ych wird – sait do dr Blatter Sepp – fir d Schwyz dä Dittel hoole
dr ganzi Oschte isch scho gschmiert, s fäält mr nur no Poole
Als Schwyzer Maischter, Olympiasiiger sottsch ebbis bsunders griege
dr FCB darf Harley faare, dr Simi Kampfjet fliege
au d Schikanone wänn mir eere – uff iri Laischtig sin mir stolz
s git e gmietligi Faart im Gillewaage ybers Bruederholz
Dresscode bi dr UBS, dr Scheff sait, loos mr zue
rooti Grawatte, kai Gnooblech ässe und z Oobe luftisch d Schue
Tattoo und Piercing sin verbotte und Sogge au die wysse
und erscht, wenn das begriffe hesch, darfsch go Kunde bschysse
Y muess ins Spittel und ha Schiss, si wänn mi operiere
dr Scheffarzt kunnt heggschtpherseenlig und mecht mi informiere
„Doktor Müller, das wird schon wieder“ – doch mi verloot dr Muet
wenn e Schwoob sait, ass er Doggder isch – ou, das kunnt nit guet