Guete Oobe zämme, sinn iir alli doo
zem Schnitzelbängg go singe, sinn miir doo iine koo
wie jeedes Joor – iir kenned s scho – isch s bi uns Programm
mer singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
Dr Megge, wo gmuggt het, muess nit in d Kischte, er blybt dehaim z Birsfälde
d Schmiir lait iim e Pailsänder aa, wo jeede Wangg duet mälde
Fyyr und Flamme sinn au d Sportverain und dien noch däm Gräätli schreie
dangg däm gseet dr Trainer, wo sini Stemmaggrobaate im Hang uff d Schnuure gheie
Fascht rund um d Uur schloot dr Zaiger uus, sait e zfridene Kund noch em Tescht
ainewääg han ych e Regglamazion, halte Sii sich fescht
Sii, das Gräät zaigt kai Wangg jeede Samschtig zwische acht und zää
kai Wunder, Si deerfe das Gräät doch nit eme FCB-Spiiler gää
Wär dräggigi Glaider het, dä schaltet d Weschmaschine yy,
nur d Lewinsky bringt befläggti Wesch bim FBI verbyy
wool yberlegt isch die Handlig, si isch e gscheiti Brut
uff dytsch haisst FBI doch Fläägg-Behandligs-Institut
Nai, bim Sepp Trütsch haisst das Fraid Bim Imbiss, dä het 40 Pfund abgnoo
hundert Pfund mee verliert d Bella-Nella, iire Frind, dä lauft dervoo
Nella, bisch ainsam? Gang ins Hotel d’Amuur, und sott diir das zviil koschte
buechsch e Nacht – s isch graatis deert – z Hölstai uff em Boschte
Fir die aartgrächti Haltig vo de Elifante hänn si s Blätzli nonig gfunde
mer versteen das nit, elf Aartverwanti sinn scho lang im Joggeli unde
dr WWF sait, deert syyg s ne z kalt, me miess das yberdache
das isch kai Problem, mer hänn s organisiert, dr Christo liiferet d Blache
Die Baim in Rieche sinn dr Hit, Dausigi sind koo
und s Comité het s gwirdiget und uff d Blagedde doo
jä nai, mit em Christo het das nit z due, die kemme doch nit druus
sit Joore sait ain z Amerika „Monica, mer paggen uus!“
Zwische em Blääsiring und dr Fäldbärgstrooss händlet dr Türgg mit em Kurd
dass me im Balcab-Programmblatz 56 yyre Kanal uffschalte wurd
mer hätte d Leesig, das steert e kaine, wil dää Verluscht wäär glai
schaltet baidi uff und stryychet SF1 und 2
Au d Säägel stryycht im SF2 im Abrille dr Dieter Moor
au dr Derrigg isch gange, s sait kaine mee, Harry, fahr den Wagen vor
nur dr Underschiid isch, dr Derrigg duet de Verbrächer d Freihait nää
und em Moor sy Sändig isch s greescht Verbräche, wo s im Färnsee jee het gää
Tauer reddi, mer fliege graad ybere Keerichtdebbonyy
nai, Herr Piggar, lut Blaan mien das d Baim vo Rieche syy
sii, do unde liggt e Boschtraubsagg, mälde si s Interpol
nai, si fliege yber s Schwoobeland, das isch dr Helmut Kool
Und do isch ain mit blutte Bai, d Glaider uff em Disch
alles normal, das isch s wysse Huus, wo dr Bill am gvätterle isch
do schlugge si farbigi Keerner, isch das Riis? Sinn mer yber Kyna?
nai, das isch s Zmidaag, s git Pille hit, fir e Zülle und Festina
S IOC het uusegfunde, dass me Beschtächigsgälder zaali
ussgschlosse wärde drum dr Kongo, Swasiland und Mali
fir uns isch das e Katastroofe, Si wärde s graad verstoo
das sinn die letschte Länder, wo miir in dr Abfaart kenne schloo
Fir zwaidausigundzwai het Sion kai Gleggli, mer dien no immer druure
derbyy hätte mer die doch kenne bestäche mit Schoggi, Kääs und Uure
werum s nit glappt het – lueg dr Oogi aa -, kenne mer ys dängge
woorschyynlig het dä de Afrikaner d Uriella welle schängge
Der Hermann Maier aus Eesterraich und dr Lasse Schüüs vo Noorwääge
sinn mit dr dupfeglyyche Zyt an dr Spitze glääge
d Schwyzer dien s Renne analysiere, vom Start bis ins Ziil kasch gsee
bi Zääntel und Hundertstel sinn s schnäller gsi, nur Sekunde bruuche si mee
S Drämmli kunnt gar Minute z spoot, dr Kombolino sell drum koo
dä isch megalang, kasch guet schwarz faare, dr Kontrollöör kunnt nit noo
säggsedrissig Meter oder drey mool zweelf, und gseen Si s nonig ganz
normal isch das ime Wältgöpprenne vom Siiger zem Schwyzer d Distanz
E halb Joor scho han ych nääbe dr Arbet no e zwaiti Stell
s ainzig Flaisch, wo s bi uns no git, sinn d Aaschnitt us em Bell
statt Wyy git s numme Wasser, lägg, hänn miir doo glitte
und znacht schloofe mer – s Huus isch verkauft – inere Hundehitte
Die Glaider sinn vom roote Gryyz und verhandlet hänn mer denne
mit de Granggekasse, dass mer im Spittel 4. Glass liige kenne
au d Ferieziil sinn definiert: Birskepfli oder Schrebergarte
und drotz allem Spaare fäält no e Lappe fir e FCB-Saisonkarte
So, das wäär s fir hitte gsi vo unserem Schnitzelbangg
hoffedlig hänn iir Fraid dra gha, mer saage härzlig Dangg
wyterhyy e scheene Oobe und e tolls Programm
mached s guet bis zem näggschte Joor – Eyri zwai Tam Tam
Tam Taram Tam Tam Tam Tam Tam Taram Tam Tam