Gueten Oobe zämme, sin iir alli do?
zem Schnitzelbängg go singe, sin mir do iine koo
wie jedes Joor – iir kenned s scho – isch s bi uns Brogramm
mr singe zämme nonem Värs Tam Taram Tam Tam
Tam Taram Tam Tam Tam Tam Tam Taram Tam Tam
Vo Guantanamo kunnt ain in d Schwiiz, das isch ussergweenlig
d Calmi-Rey empfangt dä Typ am Flugblatz hechstperseenlig
si streggt ym e Bäärli Halbschue aane und maint denn mit viil Gfiil
wenn sie damit diese Bloschär treffen, kriegen Sii Asiil
Dr Forster sait, als näggschte Bond will y e Schwiizer haa
Erfaarig bruucht s, drum dr Nef – dä het Affääre gha
dr Christoph Blocher – wie im Lääbe – isch äär dr Intrigant
und unerraicht dr Mörgeli – är macht d Autistunt
Dr Bush het Zyt – jetzt goot är in d Schuel -, au Rächne gheert drzue
1 + 1 git? Dr Leerer steent und ergläärt s in aller Rue
Tschortsch, dir fliegt e Schue umme Grind – iine isch es glaar
wenn e Halbschue zemme Halbschue fliegt, so git s e Halbschuebaar
Dr Cisalpino hoppered, dä Aabligg isch zem Gruuse
und kunnt e ängi Kurve, hesch Schiss, är fliegi uuse
voorzue bliibt är – technisch schwach – irgendnaime stoo
und wisse si? Bim EHC isch das au esoo!
D Nagra het e Lischte gmacht, au Ziri het me druff
uss unserer Sicht optimal – Drägg fallt deert nimm uff
und falls das Zyygs denn uusekunnt – s isch glyych, will d Nagra zaalt
und s wäri wirgglig s erschti Mool, wo e Ziircher straalt
Waisch no deert dä Euromatsch, wo s grägnet het wie gspunne?
d Schwiizer kämpfe – d Tirgge au -, und laider hän die gwunne
aber ains isch halt e Nowum gsi, bis hitte unerraicht
elf Tirgge, wo go schaffe geen, au wenn s e bitzeli saicht
Hundert Frangge han y geschtert ghoolt fir my Gettikind
bi vor em Schaffe in d UBS – amme goot das gschwind
du muesch warte, haisst s am Schalter, zerscht kunnt dä hinde draa
Loos, dä zaalt si Bonus zrugg, denn kasch di Lappe ha
Dr Uurgnall glingt z Gäänf im CERN – Sii, das isch verreggt
und e Gräät, wo Daili beschleynige kaa, hän die au entdeggt
mir hoffe schwäär uff e Brototyp, wo me ins Hirni pflanze kaa
so kunnt dä Papst au e Mool in däm Joorhundert aa
Dr Schmid git ab wäg däm Nef, dr Bush wägem Obama
dr Federer git an Nadal ab, lägg, isch das e Draama
s het scho abgfäärbt, liebe Rotschi, wottsch es nit kapiere?
wenn deert woonscht, wo dä Ospel woont, kasch jo nur verliere
D Holländer kemme – e jede isch frindlig und sympatisch
si singe, grööle, suffe vyyl – aber kain isch broblematisch
vorbildlig isch s Verhalte – und wie schnäll die wiider geen!
jetzt sotte s d Schwoobe au so mache; waisch, wie wär das scheen?
Dr Obama schliesst Guantanamo und kunnt bi uns verbyy
e Katalog mit Schwäärverbrächer: welli derfe s syy?
mir verhandle knallhart – stundelang – und ainige is uff zää
derfiir muesch du dr Muurer und dr Blocher nää
Y verschrott mi Kaare – e Bräämie git s -, vom Staat uus macht das Sinn
am Graane hängt e Sauboliide – deert sitzt no aine drin
dr Graanefierer grinst mi aa und maint denn kurz und drogge
waisch, Raaser griege d Bräämie nur, wenn si dinne hogge
Hän si au die Waansinnsgschicht vo däre Waldfrau gheert?
si versteggt sich am Daag und wanderet znacht und het so kaine gsteert
zweelf Joor het die d Schnuure ghalte – do kunnt ys die Idee
das wär e gscheits Barteibrogramm – ideal fir d SVP
Uff Wienacht wintsch y mir als Single e erotische Kaländer
jedes Mool, wenn y dra dängg, bikumm y grad e roote Kopf
y lueg in aa und gib in zrugg – mi gruust scho s Bild vom Jänner
si, deert isch dr –minu druff im Ganzkeerper-Scanner
Die gschnätzlet Brasilianerin bringt mi uff d Idee
das mach y au, aber ains isch glaar, y schrib nit SVP
nai, Gigi nimmi, das git Gäld, doch s schniide macht mir Mie
dummerwiis han ych die glyychi Lääderhuut wie die
Piraate jaage z Affrigha – d Schwiiz iebt im voruus
dr Oschpel maint, do mach y mit – bi Schiffbruch kumm y druus
dr Käptn kommandiert vermummt und drait au Waffe schwääri
s isch d Calmi-Rey mit Kopfduech uff dr Minschterfääri
So, das wär s fir hitte gsi vo unserem Schnitzelbangg
hoffedlig hän iir Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam