Gueten Oobe zämme, sind yyr alli do
zem Schnitzelbängg go singe, sind mir doo yyne koo
wie jedes Joor – yyr kenned s scho – isch s bi uns Brogramm
mr singe zämme noch em Värs Tam Taram Tam Tam
Tam Taram Tam Tam Tam Tam Tam Taram Tam Tam
Dr Tennis-Begger, dä Superstar, uff em Blatz und au drnäbe
mit „Augebligg, verwaile doch“ beschryybt är uns sy Lääbe
miir hän sy Buech lyycht redigiert – jetzt isch sy Wärgg e Schlägg
drby git s nur zwai Unterschiid – d ä und ö sind wägg!
Ständerlampe, Schorsch und Pierrot oder Peperoni
fir die beschte Värs git s e Bryys – Si, das isch nit ooni
d UBS stiftet säggs dausig Stai – die wänn drmit nur Braale
dr beschti Bangg bikunnt dä Bryys und die schlächtischt duet iin zaale
E ryyche Ziircher sitzt im Garte und liist grad d Beersebricht,
e Russetschett im Syydaaflug, nur s WC isch nit dicht
so ne Pflätter landet uff sim Kopf, lägg het dä afoo spinne,
was sell das? jetzt isch uff sim Kopf s glyyche wie drin inne.
Dr Hakan het kai Gligg z Paris, er blyybt nur kurzi Zyt
uff Istanbul will d Mamme nit, mit em Dreyraad sig daas z wyt
Stuttgart zaalt cash – s Gigi isch froo – nur dr Drainer druurt em noo
kai Angscht, Herr Gross, am Oschtermäntig isch er wiider doo
Dr Berlusconi hyylt als wie mee, will s Volgg zvyyl demonstriert
drum het er sini Dräänesegg im Ghaime operiert
d Kirurge hänn pfuscht – me seet s sofort-, sunscht wär s Resultat esoo
dr Silvio wär wägoperiert und d Dräänesegg no do
Y ha dr Saddam am Färnsee gse, verstruublet und nit rasiert
mainsch du dä mit verrissene Glaider und am Keerper ramponiert?
die Bilder hän my total gschoggt – das isch nit dr Saddam, das kasch du glatt vergässe
dä armi Kärl isch dummerwiis im entglaiste Zwaier gsässe
D Rolldräbbe am Baanhoof SBB sinn e Katastroofe
z Ziri sinn s schnäller, drum kenne die zwai Stund länger schloofe
wär d Rolldräbbe vom Baanhoof im Mässeduurm – wo gosch du hii? In die Bar, waisch die root
my Hochzyyt isch deert am 8. Mai, und d Frau sait, kumm nit z spoot!
An dr Supperboul z Ameriggha singt d Tschänet Tschäggsen lutt
äng umschlunge mit däm Timberleik – bletzlig blutti Hutt
das git s nit nur z Ameriggha, was mainsch, was bi uns bassiert,
wird dr Cupfinal vom Trütsch und dr Martinetti moderiert?
E Schwyyzer wird Scheff bi Sat.1, fir e Schawinski isch s dr Hit
s isch sini Idee gsi, do sait dr Schmidt „so mach ich nicht mehr mit!“
sy mache e Umfroog, welle sell blyybe? Mr hän d Leesig kurz und gnabb
do e Zircher, deert e Schwoob – ych stell dr Färnsee ab
E Gwinner z finde fir e Basler Stärn isch daas Joor nit so schwäär
dr Grischdian Grooss macht dr FCB in Europa populäär
bi dr Yybergoob – do lächlet äär – dä Bryys, dä macht yyn froo
fir uns wär s schlimm, wenn e Basler e Bryys in Ziiri wurd bikoo
Will dr erschti Mai und dr erscht Auguscht am e Sunntig sin
sait s Staatspersonal „mr wänn meer frey“, sii, y glaub, y spinn
als Näggschds wänn die nooch zwai Stund schaffe – die Laischtig isch doch stargg
e Massascheboo zem sich erhoole im Migros-Wellness-Pargg
wär mit em Drämmli zer Arbet faart, beloont me fir si Muet
ab sofort het dä Aendi Monet e Schittelzuelaag z guet
und Drämmlifierer, wo Schicht mien schaffe, bekemme als Beloonig
hundert Meter vom Deppo wägg e Siibezimmer-Woonig
d Leerer wänn wäg däm Stress – si dien ys laid, oo je
zer Wiideryygliderig in Arbetsbrozäss e Wuche Ferie mee
uff em Glaaraboschte fuchtle d Schugger uss Fraid mit dr Bischtoole
mr kenne grattis d Grundschuel mache oder wiiderhoole
Dr Meerz muess s Defizit halbiere, doch elai isch äär arm draa
äär bifiilt em Blocher – du muesch mr hälfe, gang noch Affrigha
liebi Manne, liebi Froue, ych muess iine sääge mit Asüül isch Schluss
am beschte wär, är wurd dert blyybe, denn hämmer Yyberschuss
Sy hän e Vakanz in dr Finanz, das fiert zer Diskrepanz
d CVP pocht uff d Konkordanz und schweert uff iri Emanz
d FDP goot in Allianz mit dr Arroganz
mr versteen s nit ganz, drum unseri Bilanz – das intressiert kai Schwanz!
D EM 08 inschpiriert dr Häbse, e Häbse-Pargg muess aane
acht Gugge, acht Bängg, e Orcheschtergraabe isch er scho am Blaane
statt kalter Waije Catering-Service – vom Beschte, wirsch es see
als Highlight git s – frai dy druff – pro Raihe acht Stiel mee
E Jurassic Pargg im Bundesroot finde miir nit scheen
ain mit Heergräät, ain mit Glatze und ain mit dritte Zeen
57 – 59 – 61 – 63 – als Schwyyzer muesch die Zaale kenne
d Schifaarer raase uff die Blätz in de Wältgöpprenne
D Superliig isch fir uns e Erfolg, au wenn s de Ziircher stinggt
die Grasshoppers hän zem erschte Mool drey Fääns meer als Pinggt
toll isch, dass me dr Basler Vorschprung mit zwai Glygge verglyyche kaa
dr FCB isch am Bummelsunntig, und GC moolt d Laarve aa
Dr Gölä – vulgo Marco Pfeuti – setzt alles uff ai Karte
mit neyem Namme änglisch singe – soo will är duurestarte
70 000 in dr Roggarena – daas bringt yyn voll uff Duure
dr Mänätscher schreyt – d Stouns kemme gli – sy mien no d Biini muure
So, das wär s fir hitte gsi vo unserem Schnitzelbangg
hoffedlig hän yyr Fraid dra gha, mr saage härzlig Dangg
wyyterhii e scheene Oobe und e tolls Brogramm
mached s guet bis zem näggschte Mool – Eyri zwai Tam Tam