Gueten Oobe zämme, sin iir alli do?
Zem Schnitzelbängg go singe, sin mir do iine koo
Wie jedes Joor – iir kenned s scho – isch s bi uns Brogramm
Mr singe zämme nochem Värs Tam Taram Tam Tam
Tam Taram Tam Tam Tam Tam Tam Taram Tam Tam
Die riichi Schwiiz verdailt Milliarde, aini goot in Oschte
D Kinderzuelaag wird erhöht, he joo, die Kinder koschte
Au z Ditschland git s meer Kindergäld, d Regierig het nit gschloofe
Mir finde, wär e Schwoob gebäärt, muess me ganz hart stroofe
E wieschti Frau, e scheens Gollie bis an Rieme aabe
S isch megadyyr, das Subbergschängg vom Tscharls an syni Schaabe
Loos, Camilla, du darfsch das Ding nur am Mändig haa
Und bis am Sunntig han ych s denn als Ooreringli aa
E Kirche deggoriert mit Blueme, s Orgelespiil foot a
Dr Pfarrer verzwiiflet ab dr Brut, lägg, muess dä Närve ha
Y froog sii jetzt zem zäänte Mool, y kaa sii nit verstoo
Wänn sii dä Maa? E Momänt isch s still, und denn sait d Hingis „jo“
D Fuessballfäns uss aller Wält dräffe sich in dr Maile
Tolli Mätsch bi Wurscht und Bier dien sy friidlig daile
Au Schwyzer Clübb hän iire Fäns e soone Zoone gschänggt
Fir GC het am Limmetgee e Meter Drottwaar glänggt
D Rosch, die baut e Megaturm, gschesch s uff däre Foti
Ins ney Casino kemme Staare wie dr Pavarotti
D Gressi spieglet d Gwalideet, so duet s emänd yys schyyne
In däm Fall längt fir dr EHC e Deelifoonkabyyne
Dr Märtblatz straalt in neyem Liecht vom Oobe bis am Morge
Jetzt muesch du halt dy Abfallsagg amen andere Ort entsorge
Zäädausig Luggs – e halb Joor Aarbed -, im Rothuus goot das schnäller
Ai Reschokerzli zmitts im Saal – und scho sin alli häller
TAM – das haisst Tagesschau aaschliessend Meteo
Unseri Brognoose fir moorn isch ebbe so
Ziri gruusig, siibe Grad – als Ziircher griegsch Kompläggs
Baasel sunnig und e Beebe, Sterggi zwai komma säggs
Im Gschichtsbuech stoot St. Jakob-Pargg am 13. Mai
D Baasler hän nur ai Gool, und d Ziircher, die hän zwai
Mit Lyychtbetaarde, Faanestange hän d Baasler kämpft fir siii
Zwai Stund lang het das duuret, denn sin Ziircher gschlaage gsi
Drämmli, Drämmli, Drämmli, Drämmli, d Blaaner find s gail
Ai Linie sott ins Elsass go, en anderi no Weil
Ass d BVB ins Ussland faart, duet ys schampar steere
No unserer Mainig sott dr Achter am Glarablatz scho keere
S Staatspersonal sott änglisch leere, e Drämmler macht das gschiggt
Linggs stoot Ryygass, und rächts drnäbe haisst s red light district
In däm Fall muess dr Bläsiring dr Turkish Circle syy
Und Rieche Gränze – Du waisch es au – attention, Germany
Wyter goot s mit ganze Sätz, dr Drämmler frait sich seer
„er steht im Tor“ haisst „Petric is playing everywhere“
e Schugger sitzt grad näbedraa und maint, das isch doch shit
bi dr rächte Spalte muess y roote, und linggs verstoon y s nit
Baasel – d Hauptstadt vo dr Schwyz – Si, das macht doch Spass
Dangg Faschtewaije, Roosekiechli und em Hyppograss
Die feyne Sache sind dr Schtolz vo dr Baasler Faane
Wie bitte, hesch Läggerli gsait? Kumm emol doo aane!
1811 oder 1818? Si, mr wisse s nit
glaar isch, ass e kaini e gscheiti Usskunft git
1819 isch kai Usskunft, nur d Fääler vom Combino
und 1820 Stunde bruuchsch, laufsch um s ney Casino
1830 sin am Matsch vom EHC drbii
und 1840 Spiiler kauft s Gigi das Joor ii
1850 het dr Rotscher s letschte Mool verloore
und 1860 isch dr ainzig nätti Schwoob geboore
1870 verdient dr Ospel ebbe pro Sekunde
1880 het die s letschte Mool dr Wäg zem Gwaffeer gfunde
1890 isch s letschte Byspiil, wo mir hitte nämme
s entspricht genau em IQ vo 1000 Ziircher zämme
So, das wär s fir hitte gsi vo unserem Schnitzelbangg
Hoffedlig hän iir Fraid dra gha, mr saage härzlig Dangg
Wyyterhii e scheene Oobe und e tolls Brogramm
Mached s guet bis zem näggschte Mool – Eyri zwai Tam Tam