Gueten Oobe zämme, sin iir alli do?
Zem Schnitzelbängg go singe, sin mir do iine koo
Wie jedes Joor – iir kenned s scho – isch s bi uns Brogramm
Mr singe zämme nonem Värs Tam Taram Tam Tam
Tam Taram Tam Tam Tam Tam Tam Taram Tam Tam
Zem Hochzytsdaag het d Gwiin vom Philipp e Guetschyyn iiberkoo
Dr Doggder ergläärt, bim Botox spritze isch dr Ablauf so
10 Falte schaff y inere Stund – und denn no driiber moole
in däm Fall kan y mini Alti s näggscht Joor wiider hoole
Nuggi gä, Windle wäggsle – wäm macht das scho Mie?
Dr Begger beglyggt ys mit sym Buech, wie Kinder sottsch erzie
dä sell doch schryybe – das git e Hit – s wird zwoor nie komplett
e gsammlet Wärgg mit Ort und Nämme, won er s scho dryybe het
S isch z Baasel ain im Sportflugzyg e Stadtrundflug go mache
alles Roger, är luegt aabe, denn vergoot iim s Lache
schloot d Händ vor s Gsicht, e Härzbaragge und schreyt ojemine
so goot s de maischte an de Mätsch vo unserem EHC
Dr PC stellsch do unde ab, d Fänschter wärde butzt
Kaffi isch grattis – s WC im Gang wird vo allne benutzt
Sitzig am achti und surfe darfsch nur vo nyyn bis zää
So het dr Blocher Aendi Joor si Arbet iibergää
Dr Rotschi kunnt uff e Margge, das wärtet die grad uff
Dr Blocher kasch fir das nit nää, d Schnurre basst nit druff
Dr Piero, sii, dä blatzt vor Nyydd, statt Singe nur Skandaal
Nimmsch dr –minu, bruuchsch kai Lyym, dä gläbt doch iiberaal
Dr Kontaggt zue Fäns, maint dr Huggel, isch fir d Spiiler wichtig
In däm Fall macht dr FC Thun im Grund gno alles richtig
Das kaa z Baasel nit bassiere, schweert er im Vertraue
Hesch ai Mool mit dr Oeri badet, vergoot dr Luscht uff Fraue
S Wasser, wo vo Muttenz kunnt, git Broblem bim Schlugge
In Kiina sin d Fisch nimm gligglig, si schwimme uff em Rugge
E Huffe Mischt au in Neapel – d Schand vo däm Joorduusig
Und Ziri isch au ooni Mischt aifach numme gruusig
Porta Alpina wird nit baut, Dytschland brotäschtiert
Am ökologisch Reisen sind wir interessiert
Mir baue dääne e Light-Version – sogar e Baiz zem Aesse
Nur ains isch glaar, dr Lift noch uffe kenne die vergässe
Mir sammle fir e guete Zwägg und dien ys engagiere
Mir mache s vor – mache si mit – und bitte nit geniere
Si kenne wirgglig alles gä – und das mit rainem Gwisse
Dr Ospel het kai Bonus gha – lägg, däm goot s verschisse
Aifach heerlig, ob kalt mit Sänf oder haiss vom Grill
Perfäggt dr Inhalt, nur d EU sait, ass si d Huut nimm will
S git vyyl schlimmers, wo n ys närvt – dääglig in dr Glotze
Bi dr SVP isch d Huut au schlächt, und dr Inhalt isch zem Kotze
Dr FCB kauft sone Schlitte, dä Verain isch ryych
Schnittig, schnäll und megastargg, s isch bi baide glyych
Dr EHC wott au e Auti – entsprächend sim Niwoo
In däm Fall mien die z Kaiseraugscht uff e Schrottblatz go
D Tagesschau in Gebäärdesprooch – statt schwätze dien si wingge
Fir d Calmy-Rey duesch d Höörli stryyche, bim Couchepin längsch an Zingge
Auge zue haisst Sämi Schmid – Blocher, du muesch go
Fir e Rotschi hebt me d Aerm in d Luft – und Hingis goot eso
Mit dääre Mannschaft het s dr Köbi an dr EM schwär
S isch heggschti Zyt fir neyi Spiiler, mr wisse au scho wär
Rächts, do stirmt dr Christoph Blocher, denn wait en andere Wind
Dr Schacher Seppli, will bi iim d Eltere Schwyzer sind
D Striggedde isch immer drby, wenn s au gar nyt bringt
Dr Bobo muess bim Gägner schutte, denn macht dä kaini Pinggt
Als Rammbogg vorne dr Piero E. – dr Bligg het s scho erläbt
D Hingis im Gool, will si gärn an wysse Linie gläbt
So standhaft wir dr Sabo Franz wirsch kai Zwaite finde
Dr –minu in dr Vertaidigung, dää macht Drugg vo hinde
Mit iire Drääne macht d Francine Jordi jede Gägner schwach
Drzue no drei vom FC Thun, die leege alli flach
So, das wär s fir hitte gsi vo unserem Schnitzelbangg
Hoffedlig hän iir Fraid dra gha, mr saage härzlig Dangg
Wyyterhii e scheene Oobe und e tolls Brogramm
Mached s guet bis zem näggschte Mool – Eyri zwai Tam Tam