Gueten Oobe zämme, sin iir alli do?
zem Schnitzelbängg go singe, sin mir do iine koo
wie jedes Joor – iir kenned s scho – isch s bi uns Programm
mr singe zämme nonem Värs Tam Taram Tam Tam
Tam Taram Tam Tam Tam Tam Tam Taram Tam Tam
Fertig isch s mit Babbe Razzi – er muess sy Gsundhait schoone
und wird ab Meerz mit siibe Nonne ime Gloschter woone
si koche, wäsche, butze fir iin und fraie sich an däm Maa
e Wiibratoor, wo so zitteret, hän die no gar nie gha
S Asiilschiff isch dr Bach durab, bi uns isch kaine muff
Ziri baut fir die e Huus und nimmt grad dausig uff
die erschte kemme und luege umme – aini sait zem Maa
Schatz, das Ziri gfallt mr nit – zrugg uff Affrigha
D Waagefierer rebelliere, mr wänn e Radio
letschti bin y im Zwaier ghoggt, e Stund lang blyybt er stoo
y schrey dur s Drämmli, saag emol, bisch no am Zvieri nää
do brielt dr Drämmler, halt di Latz, zerscht lueg y zää vor zää
Dr Dépardieu isch nimm Franzoos – er sait, vivent les russes
au d Waggis sin scho halbi Schwiizer – vive le Cumulus
dr Eggsodus isch gail fir uns – und Franggryych git s dr Räscht
syt Neijoor liigt d Carla Bruni bi mir dehaim im Näscht
E Maya sait zem andere, ych ka s nit verstoo
worum muess d Wält 2012 vor Wienacht untergoo?
denn kunnt dr Berlusconi zrugg, e Fluech isch s fir die Aerde
und GC isch denn Wintermaischter – schlimmer ka s nit wärde
Dr Berlusconi sait zem Balmer uff dr Hülfteschanze
tuttoposto, ych helfe dir, ych ha vyyl Finanze
ych wird Scheff vo dr Regierig, wenn s mir z Lieschtel gfallt
und schmaisse d Pegoraro uuse – die isch 50 Joor z alt
Vo Belgrad kunnt e Delifoon – frindlig froogt ain aa
ych bi Scheff vo Stattverkeer – kan y alti Drämmli haa?
hallo, wie bitte – Jugo wägg – ych bi gwaltig gschoggt
sunscht hoole die doch, was si wänn, ooni ass ain froogt
D Kate isch schwanger – Aengland jublet und liebt die stolzi Frau
jee, die kotzt fascht jeede Daag – und Albdraim het sy au
sy erkennt – d Naduur bestimmt – und s gilt au fir die Ryyche
ass alli Kinder syt dausig Joor em Babbe vom Babbe glyyche
Grosskotzt sich d Titanic gsi – vellig arrogant
brotzig, klotzig, iiberdryybe – das isch hit bekannt
d Gschicht het s zaigt – dä Greessewaan fiert zem Untergang
in däm Fall git s – mr fraie ys – Ziri au nimm lang
Cupfinal, Siigereerig – dr Dragovic längt fiire
und glopft em Muurer zwai, drey Mool uff sy hooli Biire
y ha nit gschlaage, y bi besorgt – dailt er ys no mit
ha numme cheggt, het dä Gripen oder het er nit!
S Affehuus isch fertig baut, d Affe derfe koo
zwai Joor sin s im Ruurbhott gsi – äntlig sin si do
doch kain will uuse – alli hogge ängschtlig im e Egge
hesch soo lang numme Schwoobe gsee, wurdsch di au verstegge
Ych ha z Baasel e Woonig gfunde inere ruige Strooss
Kuchi, Baad, drzue vier Zimmer – alli häll und grooss
dr Vermieter sait, s git ai Bedingig – die Wand bliibt immer frei
fir die vom Wooghoof näbedraa isch daas dr Fluchtwääg drei
Fir s nei Ozeanium bruucht s vyyl Personaal
dr Mörgeli braalt bim Diräggter, ych bi ideal
yyverstande! Kemme sy am Mäntig uff die zwai
iir Byyro isch im Beggi vo de Groggodyyl und Hai
E ganzes Huus hän sy z Ziri aifach umblatziert
mit Staalsail und Hiidrauligbumpi – d Technigg funggzioniert
30 Santimeeter pro Minute – spontan fallt ys do yy
nit ganz so schnäll sin d Schwiizer Männer uff iire Abfaarts-Schii
Geschter sin mir z Ziri gsi und hän die Bumpi kauft
und hit am Moorge installiert – subber, wie die lauft
die Aalaag stoot jetzt obdimaal und erfillt dr Zwägg
scho morn am Moorge isch s Schwoobeland sächzig Meter wägg
Regierigssitzig – dr Morin merggt, dr Eymaa isch nit doo
er het geschter an dr Uni s vegaane Menu gno
d Eva froogt, wo steggt dr Baschi? Guy, het er verpennt?
Nai, er het bim Hemmli glette baidi Händ verbrennt
So, das isch s fir hitte gsi vo unserem Schnitzelbangg
hoffedlig hän iir Fraid dra gha, mr saage härzlig Dangg
mir zwai geen an d Gränze zrugg und fraie ys scho seer
zem luege aifach wunderscheen – scho sin s zwai Meter meer