Gueten Oobe zämme, sin iir alli do?
zem Schnitzelbängg go singe, sin mir do iine koo
wie jedes Joor – iir kenned s scho – isch s bi uns Brogramm
mr singe zämme nonem Värs Tam Taram Tam Tam
Tam Taram Tam Tam Tam Tam Tam Taram Tam Tam
Dr Obama loost d Frau Merggel ab, nur ka er nyt verstoo
d Leesig kunnt vo dr NSA, so haig er meer drvoo
si hängge moorn e Kamera iiber iires Näscht
er winggt ab, y kenn dr Grind, erspaared miir dr Räscht
Dr Carlos het mi inschbiriert, das muess y eerlig saage
drum han ych mim Scheff am Fritig e baar uff d Schnuure gschlaage
dr Richter sait, y sig brutaal und e ganz e Brimidiive
zer Stroof grieg ych e Sondersetting uff de Malediive
E triple cork noch em Yolo-Flip – ych ha s ussbrobiert
e backside twenty mit Indy grab han ych au drainiert
das glabbt perfäggt – au mit em Kaare – jetzt wird s richtig glatt
soo kum ych duur jeedi Baustell in dr Innerstadt
D Tessiner saage: mit Burka draage isch bi uns jetzt Schluss
bi gwisse Wiiber empfääle miir sogaar e Burka PLUS
s PLUS stoot fir e Pflaschter uff s Muul – uff kai Fall yberdriibe
so isch s e Fraid, s Tamara z gsee in iirem siibe vor siibe
Mir bhalte unseri Fimferli, bschliesst dr Bundesroot
aine frait sich bim FCB, wo säll in dr Zytig stoot
dr Heusler schrybt sy Dangg uff Bärn – stiilvoll mit Maniere
so kan y d Laischtig vo baide Dääge ainzeln honoriere
Im Tertianum im Zimmer zää wartet s Reesli gail
Schalke kunnt – bletzlig schreyt sy – do hängt jo ain im Sail
jeemer nai, der Fuessball hit, das sell no ain verstoo
friener sin die Spiiler als duur d Duube iine koo
D Hingis lallt – mym Eggs goot s schlächt – dä gschpyyrt no hit my Graft
d Patty schmaisst dr Rainer uuse samt Orangesaft
d Mirka maint, ych bi lieb, drum het s my Rotschi scheen
es längt jo, ass iin uff dr Wält alli andere schleen
Die erootisch Linie isch in Blaanig, sii, das sin doch Schlingeli
Noothalt uff seggsuells Verlange kasch du ha bim Glingeli
d Drämlere faart in Strabbse, das basst zem Seggstheater
und hesch verpennt, so weggt si di im Debbo Roote Kaater
Y styg ins Drämmli, grieg e Gübbli, gheer Musig hindedraa
s Liecht dezänt, die maischte hän kaibeweenig aa
e Drämler rieft – du bisch lätz, fir di isch Aendstazion
loos, du hoggsch im Sitzigswaage vo dr Diräggzion
Jetzt git s e Buech „doorum Baasel“ – e ganze Schungge voll
dausig Grind – scheen ergläärt – „worum isch Baasel toll?“
die Idee wird schnäll kopiert – ai Mool mee drnääbe
bis ain e Grund fir Ziiri findet, wird kain vo ys me lääbe
Bruefswaalglass im Gundeli – dr Leerer bemiet sich seer
schwätz hochdytsch im Bewäärbigsgspröch, sunscht griegsch du nie e Leer
dr Achmed brielt dr Leerer aa – hey, Mann, was isch loos do?
ych schutt emol in Schwiizer Nati – do schwätzt kain e so
Dr Ueli Muurer vor dr UNO – „I am swiss – känn juu verstoo?“
dää vo Ghana froogt entsetzt – „lallt dä immer soo?“
syt zwai Joor isch s no vyyl schlimmer, gheersch dä vo Maali saage
will denn het iim dr Dragowitsch ains uffs Hirni gschlaage
Dr Conti findet bletzlig Gäld, laider merggt er s z spoot
mr gratuliere zem neye Dittel eggs-Regierigsroot
drum gänn sy Gäld – mr garantiere, ass sich die Spänd au loont
mr verstegge s denn bim Morin Guy – waiss aine, wo dä woont?
Dr Bhaabscht Franziskus isch modärn, d Glaibiger sin froo
s Gäägedail vom Ratzinger – gäll, dä isch no doo
s erschte Mool in dausig Joor und sii, das het syy Grund
au dr Heergott het kai Fraid, wenn e Schwoob in Himmel kunnt
So, das isch s fir hitte gsi vo unserem Schnitzelbangg
hoffedlig hän iir Fraid dra gha, mr saage härzlig dangg
mr geen no schnäll zem Morin Guy – es isch jo nonig z spoot
und scho git s in Baasel wiider e eggs-Regierigsroot