Gueten Oobe zämme – sin iir alli doo?
zem Schnitzelbängg go singe, sin miir do iine koo
wie jedes Joor – iir kenned s scho – isch s bi uns Brogramm
mr singe zämme nonem Väärs Tam Taram Tam Tam
Tam Taram Tam Tam Tam Tam Tam Taram Tam Tam
Dr Bundesroot ermaant sy Volgg, liebi Lyt, diend spaare
doch sälber schänggt me sich uff Wienacht e dyyre Bonzekaare
hätt dä Gebbel, wo sy griege, mit iirer Laischtig z due,
so het dr Beerse e Deeschwoo z guet und d Dooris Wanderschue
Waisch no im Novämber z Lille? Säll isch fenomenaal
dr Stän gwinnt mit em Rotschi dr Daviscup-Bhoggal
mee brait wie hooch, hässlig, schwäär – lägg, isch daas e Gschängg
ains isch glunge, ass ych jetzt grad an d Schwiigermueter dängg
In zää Joor steen die heggschte Diirm – d Rosch duet jetzt scho graabe
bald luege miir – waisch, wie scheen – uff daas Ziiri aabe
sii, do git s e bessere Wääg, und erscht no ganz e schnälle
wottsch uff Ziiri aabeluege, gniess d Subberliig-Dabälle
Jeede Drämmler griegt e Pädd, dausig Äbbh het s druff
kasch Faarblään lääse, Glaider bschtelle und gseesch, do het s e Buff
e Schugger-Pädd het e ainzigs Äbbh, bi zwai gseen die scho root
wenn er ai Mool druggt, so sait das Gräät, wie er haisst und wo er stoot
Ney faart dr Achter diräggt noo Wyyl – fir d Schwoobe isch s dr Hit
aaber Sii, das Glais zrugg in d Stadt bruucht s jo wirgglig nit
rächne sii, wenn in zää Minute meer wie hundert geen
isch Baasel moorn scho Schwoobe-frey – waisch, wie wunderscheen!
Im Nazionalroot isch es z luut, jeede schnuurt deert dry
vom Läärm häär kaa s e Raasemaaier oder e Suuger sy
ai Underschiid isch frabbhant, wie miir alli seen
dr Suuger suugt dr Schissdrägg yy, wo die andere uuseleen
Unteriirdisch Mischt entsoorge dued männge Bebbi steere
wie wyt muess y laufe – und basst my Sagg au wirgglig duur die Reere?
nuur kai Angscht – miir hän gmässe – und ains isch bsunders scheen
ass au die Segg im Roothuus brobleemloos duure geen
Unvergässlig, s Dominigg Giisi – dr Schtolz vo dr Nazion
in Sotschi hyylt si – s verrysst aim s Häärz – in iir Deelifoon
d Groossmamme froogt, was macht diir Angscht? Loss es aifach uuse
dr Muurer kunnt an d Siigereerig und will deert mit miir schmuuse
Du, Giachem, joo, hesch du vo dem Flaisch-Skandaal vo de Underländer ghöört
e Ross hän die ins Rindflaisch do, du, Gian, daas isch jo gschtöört
gschpunne, yy het daas jo andersch gmacht, jo, säb scho, y waiss
y nämti do die Widmer-Schlumpf, das isch e bleedi Gaiss
S letscht Joor wird dr Megge zwelf, d Mamme gläärt yyn uff
waas isch e Frau und waas e Maa – so griegt dr Bueb kai Buff
s het subber glabbt, denn kunnt dä Daag – sythäär isch ai Theater
syt äär Kontschidda Wuurscht gsee het, lyt äär bim Bsyychiater
Do lueg y letschti d Daagesschau, säll glaubsch jo gar nit, hösch
noo zää Minute bletzlig d Froog, wo isch d Gornelia Bösch?
Kopfwee het sy, Ranzepfyffe und bruucht e baar Dääg Rue
s isch loogisch, wenn dä Sänder luegsch, kibbt s di uss de Schue
D Innerstadt isch autifrey – me wott deert kai Verkeer
aber Si – deert rund ums Glingeli – het s jo immer meer
au d Brugg isch gschperrt – jetzt kunnt d Faasnacht – lägg, git daas e Sach
wie bringsch die Waggiswääge mit dr Fääri iibere Bach?
Rammeldialäggt
Vo Schöönebuech bis Ammel – miir wai kai Fusion
drum mache miir die Höefüür – das het do Dradizion
und wyyter uff baaseldytsch
so Heehefyyr han ych als Bebbi bis hyt gar nit kennt
ha dänggt, won y uss em Fänschter lueg – juhui, daas Ziiri brennt
So, das isch s fir hitte gsi vo unserem Schnitzelbangg
hoffedlig hän iir Fraid dra gha, mr saage härzlig dangg
mr zwai geen an Määrtblatz aabe und fraie ys scho seer
bi jeedem Achter juble miir – scho wiider hundert meer